"दीया जलाहूँ"

दाई...

दीया जलाहूँ

मोला गिनती ले
एक ठन जादा दीया दे देबे।

गुरुजी कहिथे
दीया अउ ज्ञान अँजोर करथे।

दीया
बाहिर अँजोर करथे 
अँधियारी ला हरथे।
ज्ञान
भीतर अंतस म अँजोर करथे
अज्ञानता के अँधियारी ल हरथे।

दीया पर्व
ज्ञान पर्व आय।

दीया दान
ज्ञान दान आय।

एक ठन दीया ले
अनगिनत दीया जलाय जा सकथे।
ज्ञान घलो सरलग बगराय जा सकथे।

बचपन
विद्यार्थी बन
विद्यालय म आथे
ज्ञान पाथे ज्ञानवान बनथे,
तहान सेवा कार्य म लग जथे।

उपयोगी सामान बनाथे
रेंगत दउड़त जिनगी बर।

बिजली,बल्फ
छोटे अउ बड़े मशीन,अनगिन

चारपाई,
जीवन रक्षक दवाई,
जरूरी सामान अतका
बादर भर बगरे सुकवा,
चुरकी भर जुवाँड़ के लाई जतका।

दाई....

घठौंदा मा पानी बर
गाँव के सबो देवधामी बर
पुरखा बर शमसान मा
गउ के गउठान मा
पुरखौती डीह मा
अन्न देवइया महतारी खेती बर
पाँच दीया पंच तत प्रकृति बर
पुरुषपिता के नाम बर
सत के निशानी जैतखाम मा
दीया जलाहूँ

लहुटत खानी
सुरता करके
अपन विद्यालय के दुवारी म
जिहाँ ले निकले ज्ञान के प्रकाश
अनगिनत अंतस मा अँजोर करत आवत हे,

दाई...उहाँ एक ठन दीया जलाहूँ.......

दीप पर्व ज्ञान पर्व के शुभकामना अउ बधाई


-सुखदेव सिंह अहिलेश्वर"अँजोर"







टिप्पणियाँ

एक टिप्पणी भेजें

इस ब्लॉग से लोकप्रिय पोस्ट

जलहरण घनाक्षरी                    "चुनई बछर" रैली हड़ताल बर,गोंदली पताल बर, बजे खूब गाल तब जान चुनई बछर। मीडिया के पटल मा,जनता के हालत के, उठय सवाल तब जान चुनई बछर। जनता हा गोठियाय,नेता कर एड़ी खाय, होवय कमाल तब जान चुनई बछर। जनता निहाल होय,माँगय रूमाल जब, मिले साड़ी साल तब जान चुनई बछर। -सुखदेव सिंह अहिलेश्वर"अँजोर"              गोरखपुर,कवर्धा               16/06/2018
और पढ़ें
सुखदेव सिंह अहिलेश्वर के जयकारी छंद           ''मतदान'' देश करत हावय अह्वान। बहुत जरूरी हे मतदान। मतदाता बनही हुँशियार। लोक स्वप्न होही साकार। लोकतंत्र के जीव परान। मतदाता मत अउ मतदान। मत दे बर झन छूटँय लोग। कहिथे निर्वाचन आयोग। उम्मर हो गय अठरा साल। मतदाता बन करव कमाल। वोटिंग तिथि के रखलौ ध्यान। खच्चित करना हे मतदान। काज जरूरी हे झन टार। वोट ,बूथ मा जा के डार। सीयू बीयू वी वी पेट। बिस्वसनी चौबिस कैरेट। एक बात के राखन ध्यान। शान्ति पूर्ण होवय मतदान। पाछू करबो बूता आन। पहिली करना हे मतदान। अपन व्यवस्था करके जान। जब दे बर  जावन मतदान। पाँच साल मा आय चुनाव। सुग्घर जनमत दे लहुटाव। रचनाकार-सुखदेव सिंह अहिलेश्वर मुकाम-गोरखपुर कवर्धा छत्तीसगढ़ मोबाइल-9685216602
और पढ़ें
 "" सुखदेव के करुण स्वर "" सुमता सलाह के भाखा भुला गे  लागत हे मती म मिरचुक हमा गे साफ दिखत हे सुवारथ के सौदा  सच्चा ठगा गे अउ लबरा फभा गे  कुमता के आगी अउ झगरा के आँधी संघरा आही शहर गाँव लेसा जाही चारो मुड़ा राखे राख नजर आही मुआ मानवता बर महुरा धरे हे बोली म गोली बारूद भरे हे रोज मतरथे बुजा मती माथा केत बरोबर तो पाछू परे हे भेर भरम घर घर म सुलगाही घर परिवार समाज नठा जाही चारो मुड़ा राखे राख नजर आही चिन्हव चिन्हव ये अमरबेल मन ल जानव ढेकुना किरनी मनके परन ल चुहके न पावँय अब लहू कहूँ के हम ला बचाना हे अपन चमन ल बिना कमाये इन खाहीं अघाहीं हमर बिरवा ठाढ़े ठाढ़ सुखा जाही चारो मुड़ा राखे राख नजर आही रचना- सुखदेव सिंह"अहिलेश्वर"
और पढ़ें